如果冇記錯, 好似小學三年級已經開始要帶眼鏡做人, 前前後後咁多年, 都不知帶過幾多副眼鏡, 由金屬框, 帶到而家黑膠框, 由百幾度近視帶到而家5百幾度, 唔帶眼鏡完全係盲咁滯. 其實帶眼鏡帶來好多唔方便添, 打波唔方便啦, 尤其踼波打籃球, 所以我踼咁多年足球, 都未試過用頭鎚入波, 打籃球帶波殺入籃底又好驚俾人打爆眼鏡. 唯一冇乜影響既就係羽毛球啦.

其實而家帶 con 咁方便, 點解唔考慮下呢? 其實我好耐之前都有諗過, 但我個人好懶, 一聽倒話要洗 con 呢下就放棄呢個念頭, 雖然而家有即棄果d, 但算啦. 其實帶眼鏡都幾岩我, 斯斯文文咁咪幾好囉, 呃下人嘛.

但其實帶眼鏡有好多趣事, 冇帶眼鏡既人係唔會知架. 好似朝朝早起身就要盲摸摸去搵副眼鏡, 有時又放低去沖涼, 出黎搵好耐都搵唔倒, 又試過帶住副眼鏡走入去沖涼, 覺得怪怪地, 因為太清楚, 先發現自己帶住左眼鏡, 幾傻仔.